site logo: www.epochtimes.com

出外靠朋友 — 英國各地港人專訪

人氣: 2529
【字號】    
   標籤: tags: ,

【大紀元2022年01月04日訊】自LOTR同BNO visa嘅出現,英國各城市陸續都出現好多香港人,意味住移民英國嘅路途上,您絕對唔係孤單一人。相信對於唔太熟悉英國各城市嘅香港人,喺邊個城市落腳都係問題之一。根據港僑會嘅「港人移英熱門地點分析報告」,香港人會因為工作機會而揀喺Greater London定居同發展,當然咁大個國家選擇就唔係得一個,London以外嘅城市都可能適合您。以下我哋好高興訪問到分別住喺Essex、Nottinghamshire、Birmingham 同埋 Swanseas嘅香港人,睇吓佢哋定居喺當地嘅原因同埋喺英國生活又有咩貼士。

城市:Ingatestone

受訪者:Page,居英50年

Page喺70年代就跟屋企人移民過嚟英國,先後因為工作原因喺Central London同Essex入面幾個城市居住過,最後就揀左喺Ingatestone附近定居。Ingatestone介乎於Greater London同Essex 2個郡之間,所以要入Central London都好快,火車轉地鐵大概係1個鐘到。Ingatestone呢面多數都係住house同flat,2至3房單位樓價大概係40萬英磅,1房嘅單位就大概係25萬英磅。佢覺得呢區比較適合一家大細或者退休人士嚟住。

地區/環境:

如果大家想知多啲當區嘅治安同埋罪案率,可以上police.uk同埋adt.co.uk 查吓自己嗰區。

以下呢幾個區都值得推介:

1. Ingatestone:

一個村莊,比較靜同埋相對地悶,但係好悠閒,出入London做嘢都會方便啲。

2. Chelmsford:

一個相對大嘅城市,市中心比較大,工作機會比較多。

要小心嘅地區有:

1. Dagenham & Barking(Greater London):

雖然樓價好平,但係呢區好雜,呢度成日有人打交、搶嘢同埋爆竊。

2. Basildon (Essex):

呢區好多Council Houses,住嘅人都係比較雜,校網亦都好差!
關於升學:

呢面天主教學校嘅校風會好啲,如果家庭本身已經係教徒不妨可以去當區嘅教會聯誼下,亦都可以請教會入面嘅神父做小朋友嘅推薦人,會更加容易入到天主教嘅學校。

另外Essex呢面都有幾間唔錯嘅Grammar School(政府經營嘅名校,專門俾小學成績好好嘅學生讀),例如:Colchester County High School for Girls 係一間英國排名數一數二嘅Grammar School。想考入去就要先考11+ Exam (Grammar School嘅入學試),通常家長可以喺小朋友8、9歲嘅時候幫佢地搵定專門教11+ Exam嘅補習老師,上Gumtree.com 就可以搵到好多唔同嘅補習老師。

入鄉隨俗:

盡量互相尊重,同埋融入呢度嘅文化,俾一個好嘅印象英國人。當然喺呢到人生路不熟都要警覺性高啲,小心俾人呃。

例如呢區始終係一個村落,入面有時都會有馬車行,如果揸車時前面有馬車千祈唔好冇預警咁超車,因為咁樣會嚇到隻馬,好容易出意外。

又例如買屋嘅時候要留意層樓係唔係grade 1/2 listed (歷史建築),如果係嘅話間屋唔可以亂咁改裝,查到嘅話會俾人罰錢。

過來人嘅貼士

建議如果想快啲融入社區,有小朋友嘅家庭可以喺local council入面睇吓有冇啲Mother’s Club可以參與下,佢哋有時都會有啲聯誼活動,家長可以互相交流下,小朋友又可以同其他小朋友一齊玩。

當然如果想學好啲英文都可以喺local college搵一啲English as a second or foreign language(ESOL)或者其他興趣班同人交流吓,通常喺Local council同library都有呢啲班嘅海報廣告,任何年齡人士都歡迎去報。

城市:Mansfield

受訪者:Andy,一家三口居英7個月

Andy一到埗已經喺Nottinghamshire買屋,但因為當時仲未收到樓所以喺Stafford同Derby租Airbnb住過一排,順便了解吓當區嘅環境。Andy揀喺Nottinghamshire落腳係因為佢比較嚮往自然生態環境嘅生活,區內附近有森林、郊野公園,空氣相對都比較清新。

生活:

Nottingham嘅市中心會比較多華人超級市場、唐餐館同埋附近嘅小鎮都有好多大型超市,非常方便。區內最近都多咗好多香港人,我住緊嗰到都識咗幾個香港嚟嘅鄰居。住喺區內可以搭電車代步,但因為我住喺Mansfield所以揸車去市中心大概要20分鐘。如果想知更多呢區嘅嘢,建議可以上Local Council嘅官方網站了解。

工作機會:

呢區有幾個大型warehouse長期都會有招聘唔同部門嘅職位, 如果未搵到心儀嘅工可以做住先。有好多其他歐洲國家嘅移民人士都喺warehouse打工,而英語水平同埋工作效率都係我哋香港人嘅優勢,只要肯放下身段,當騎牛搵馬儲吓喺英國嘅工作經驗,搵到工絶對唔難。

當然Nottingham都有一個好似中環咁樣嘅down town,白領人士都會有唔少工作機會;如果想創業嘅話其實呢面幾流行加盟店嘅生意,變相Franchiser會提供資源同埋數據,咁開業時就唔需要由零做起。

校網:

Nottinghamshire係一個校網比較大同Outstanding學校相對地多嘅地區。

考慮到仔仔嘅學業,我地就喺到幫佢報咗間Outstanding嘅State school。如果想知道區內學校嘅評級,可以喺https://www.gov.uk/school-performance-tables 查詢,評級係由校內學生成績而定。因為英國冇得跨區揀學校,所以搵地方落腳要考慮埋當區校網!

過來人嘅貼士

我嘅建議係買樓千祈唔好隔山買牛,一定要做足功課,尤其係喺英國買樓嘅程序比香港複雜,所以唔好懶同心急。移民嘅心態上,建議香港人唔好自我封閉,多啲主動參與社區活動、同本地人多接觸、溝通。出去返工、返學可以更容易融入英國生活。盡量唔好帶住香港嘅生活習慣過嚟,虛心學習本地人嘅文化、處事方式、尊重唔同階層同種族、奉公守法,貢獻社會,令到本地人都知道香港人嘅質素!

城市:Birmingham

受訪者:Randi,居英10年以上

Randi喺10年前因為小朋友嚟Birmingham讀書嘅關係就一直喺度住咗10年以上。

Birmingham係全英國第二大嘅城市,呢到聚集咗好多唔同文化同宗教背景嘅人,亦都有好多回教寺。近年呢到都逐漸變成一個商業化嘅地區,打造緊一個金融中心,幾年前HSBC總行都搬咗上嚟,變相呢到多咗好多生活配套又多咗就業機會。

生活:

之前我住喺Merry Hill附近,出返市中心揸車都要差唔多半個鐘,呢區白人比較多就比較靜。 Birmingham City University附近有好多新嘅樓盤同商店,繁榮到好似第二個City Centre咁。China Town最近就開咗好多唔同嘅中式食肆、珍珠奶茶舖同埋華人超級市場,附近亦都有一個大型室內街市同埋其他印巴超級市場,有時喺嗰到買菜平過中超好多。最近附近嘅B5地區拆咗個Wholesale Market,開始起緊好多flat同apartment,香港人都可以睇下呢區嘅樓盤,因為都好方便。

房屋:

呢面嘅住宅區大多數係以Semi-detached house為主,就算有Apartment都只係得三層,之前住過嘅2房單位樓價大概係20萬英磅有找;宜家喺City Centre住一個2房單位要差唔多23萬英磅。如果租近市中心嘅Studio flat或者係1房單位每個月大概係650-700英磅,2房就1000-1200英磅到。

工作機會:

呢到比較多銀行同埋金融工種,NHS同埋學校都等住請人。其實如果香港人唔介意轉行做勞動工種,呢度嘅超級市場同埋商店都長期需要請倉務或者售貨員。如果英文溝通能力好其實可以試下做售貨員,人工都幾好。以我朋友喺Chanel做Sales為例,最主要sell中國客同埋留學生,佢一個月扣稅後嘅人工都有3000英磅到。

校網:

確定喺邊區住之前,首先email問咗嗰區嘅學校有冇位,如果唔係到時搬到去睇到另一個區啱嘅學校,係唔可以跨區升學,但都可以喺Local Council申請等佢派學校。 如果就小朋友嚟讀中、小學嘅我會推介以下呢幾個地區:

Selly Oak, Edgbaston, Harborne, Sutton Coldfield, Bournville

過來人嘅貼士

 推介嘅地區:

Selly Oak同Edgbaston

相對地會近市中心,大概係15-20分鐘車程,呢2個區嘅樓價唔算太高,所以都有好多華人係呢到住。

要小心嘅地區:Soho同Handsworth

呢啲地區都比較多印巴人士,睇落會比較雜同亂啲,治安亦都麻麻地。

城市:Swansea

受訪者:Freddie,居英3年

Freddie因為5年前嚟Swansea讀Master,之後為左工作選擇一個人移民過嚟Swansea定居。佢話如果要用一個香港地方去形容Swansea,西貢就最貼切。Swansea係一個沿海嘅城市,有小小新市鎮嘅感覺亦都有好多綠化空間,係一個好悠閒嘅地方。閒時Freddie鍾意沿住海邊由市中心行去The Mumbles,佢話沿途都有幾多公園值得行吓,例如Clyde Garden、Singleton Park都唔錯。

住屋:

Swansea市中心嘅一房單位租金大約係一個月600英磅樓下,要睇吓合約有冇包bills同Wi-Fi;如果唔介意租Share house嘅話價錢大約係400幾英磅一個月,不過Share house就要同人共用廚房、客廳、廁所,居住環境好與越都好睇同屋主係點嘅人。如果係自己一個嚟嘅年青人又唔介意住Share house,以下呢幾個地點可以睇下:

Uplands同Brymill有好多唔錯嘅Share house,嗰到相對地會多啲大學生租;Strand有一個好大嘅Student accommodation building,如果係學生嘅話可以租Saint David’s;Marina就會比較多華人學生租住,亦都好近海邊。

如果想揀比較好嘅地區,可以睇吓Sketty、Killay (Uplands) 同埋The Mumbles (Post Code: SA3),佢地係比較有錢啲嘅地方。有小朋友嘅家庭可以考慮吓Sketty呢個地方,因為佢嘅校網好,附近有一間全威爾斯排頭幾名嘅中小學––Olchfa School。

當然咁大個城市都有一啲冇咁好嘅地區,我唔會建議香港人揀喺Mayhill、

Townhill同埋Mount Pleasant呢啲地方住,呢啲都係治安冇咁好嘅地方。呢幾個地區起咗好多Council house (公屋),人流比較複雜,住嘅人多數都係拎緊統一福利金俾市政府安排入去住嘅低下階層。而正正因為呢度品流複雜,經常發生劫案,治安問題嚴重,樓價都相對地低。所以千祈唔好俾佢嘅價錢吸引到而揀喺呢區定居。

工作機會:

可能因為英國脫歐之後勞動階層少咗批歐洲人去做,所以變相市場對藍領工作嘅需求比較大,例如做工程或者倉務都好快就會搵到工!另外Wales政府有推出學徒計劃,過程中僱主會提供唔同嘅藍領工作機會,例如水電工、工程助理,完成咗個課程仲會俾到一個資歷架構2-3級證書,當然呢個計劃都冇年齡限制,如果唔怕轉行嘅香港人其實可以學返門技能旁身。想留意吓有咩學徒計劃招聘緊人,可以去Careers Wales, https://careerswales.gov.wales/ 輸入返地址或者Post code就會有搵到附近提供培訓嘅僱主。另外當然大家都可以喺呢個網站搵到一啲求職資訊,例如履歷表同埋求職信嘅格式,符合返呢面搵工嘅要求。

當然都好睇移民過嚟嘅香港人搵工嘅態度,要有心理準備做唔返老本行或者要由頭爬起,但係我覺得可以搵到咩工都試吓做住先,喺度建立多啲人際關係,到時想轉工都有人可以幫你做推薦人。

華人社區:

想買亞洲食品、日用品嘅地方可以去Sandfields一帶同埋St. Helen’s Road到Bryn-y-mor Road,嗰度都有唔少亞洲人同埋以前移民過嚟嘅香港人開嘅商店同食肆。

呢到以前有一個機構叫做史雲斯華人社區互助中心已經喺度差唔多20年,後來由威爾斯華人協會接手,佢地喺區內主要為華人提供專業服務,佢哋都會提供到廣東話同國語嘅服務,方便英文冇咁好嘅華人去搵佢哋幫手。

過來人嘅貼士

香港人嚟到Wales盡量試吓放低小小香港嘅生活習慣,融入社區同呢度嘅人接觸,甚至可以學吓威爾斯語同本地人互相交流吓文化。大家可以喺www.fancharity.org搵吓一啲peer group或者興趣班同多啲當地人傾計,我覺得呢個係一個好好嘅機會去練英文口語能力,好多時英文口音真係唔重要,最緊要肯講、凡事虛心學習同埋有禮貌,當地人都會有耐性教你。

責任編輯:陳彬

評論