英國人又點睇香港人？

來自「星月同行」HKG International的便簽（HKG提供）

更新 2022-01-01 3:27 AM 人氣 937

【大紀元2022年01月01日訊】

香港連隣 HK Link Up

香港連隣是一個非營利組織，旨在將英國居民與抵英的香港人聯繫起來。我們正在推行夥伴計劃 – 當你到臨英國，我們會為你們安排當地人作為你們新生活上的夥伴，為你們解答生活上的咨詢，以及文化上的交流。這些夥伴亦樂意為你們提供人際圈的連結。我們期望夥伴之間能夠建立長遠的友誼，以及夥伴之間在情緒上能夠互相支撐，以令港人在英國能進入最順利的適應。

受訪者：Nick Woods (HK Link Up本地義工)

Nick係一個住喺Portsmouth嘅Hong Kong Link Up本地義工，佢曾經透過Hong Kong Link Up嘅Buddy Scheme幫助過一個以LOTR身份移民嘅單親家庭喺當地安頓好生活。
佢對於香港人移民英國嘅消息相當了解，亦都表示好歡迎香港人加入英國呢個文化多元化嘅大家庭！

以下內容取自編輯同Nick嘅訪問，內容會翻譯成廣東話方便大家理解。

Nick後生嗰陣隔離屋住咗一個嚟自香港嘅移民家庭，因為大家左鄰右里嘅關係，佢哋經常有交流，所以佢對香港人有一個好好嘅印象，亦都對香港呢個地方多咗認識。

「住喺隔離嘅香港家庭喺同一條街開咗一間唐餐館，佢哋經常會請我哋一家試食唔同嘅港式菜，對於我嚟講係一個好好嘅回憶，我亦都覺得香港人好好客、對我哋外國人都特別親切。因為呢一個家庭令到我對香港呢個地方多咗認識，其實睇到香港宜家咁樣我個心都唔安樂，我知道根據中英聯合聲明香港喺九七年會回歸中國，但係睇到宜家香港嘅社會狀況漸漸變得越嚟越差，我就覺得英國好似遺棄咗香港咁。」

加入HK Link Up做義工

成為朋友

喺2020年10月Nick幫過一個喺Portsmouth落腳嘅單親家庭。當Nick知道呢個家庭從來都未嚟過英國，除咗提醒佢哋初嚟報道要申請嘅嘢之外，佢好希望藉住介紹自己嘅屋企人同佢哋一家聯誼去，等佢哋容易啲融入英國生活。Lockdown後佢哋兩家人約咗喺沙灘附近一齊野餐、互相交流，之後又一齊去玩Paddleboarding。

香港人喺英國嘅日常溝通

Nick覺得香港人唔需要太擔心言語上溝通唔到，就好似呢個家庭為例，雖然Nick覺得佢哋嘅英文溝通冇問題，但媽媽就對自己嘅英文冇乜信心，Nick覺得最緊要係有心肯講肯學，好多人都願意幫手。如果基本溝真係好大困難，可以試下去Council搵一啲免費嘅英文班，但基本上學得最快都係同英國人多啲溝通，多啲交流自然就會識得講。

香港移民潮英國人嘅負擔？

「我從來唔會咁樣諗，歷史嚟講，自80年代起英國本土已經有一個好大嘅華人圈子，佢哋可以喺呢個國家建立到自己嘅網絡、開餐館甚至係大型嘅超級市場已經證明佢哋有能力喺呢個國家自給自足；我都相信接住嚟嘅香港人都係一個對國家重要嘅勞動力，同時亦都可以刺激國家嘅經濟。我成日覺得香港人好勤力同埋喺工作上好快就上手，相信呢度有好多工種佢哋都適合做。」

“I think that’s a different type of immigration. The Hongkongers seem ready to work, built for themselves rather than wanting stuff (from the country).”

—— Nick

需要更多資訊幫忙嘅香港人，歡迎瀏覽以下網頁：hklink.uk

「星月同行」HKG International

“我覺得香港人如果有嚟過英國嘅話都唔會太難熟悉呢邊嘅生活，最緊要係喺呢度建立一個網絡，識多幾個人起碼大家都有個照應，呢個亦係其中一個我搞星月同行嘅原因。”
—— Ivan Yip

一對一友伴配對服務

「出外靠朋友」，但不是每個移居外地的港人，都有朋友在外。

由幾個熱心香港人於2021年6月在英國註冊成立，HKG International 旨在連結同路香港人，透過推出「星月同行」海外港人友伴計劃，提供一對一配對服務，希望促進港人的互助精神。

計劃將招募移居英國超過四個月的港人充當響導及友伴 (簡稱「月亮」)，為準備移居或初到埗同區的港人 (簡稱「星星」)，提供為期三個月的支援，助「星星」更快適應當地生活、建立社交圈子。「星星」需承諾在抵英四個月後成為「月亮」，幫助下一批港人，延續守望相助的精神，並一步步凝聚港人力量。

「星星」在報名時需付 £100。學生、未成年、尋求政治庇護、傷殘或有經濟困難人士，可申請服務費用豁免。當中£50 畀「月亮」作基本交通及服務津貼；另外 £50 將用作補助上述費用豁免人士參與此計劃的開支，及應付團隊基本的營運及行政開支。

Chester到Birmingham 安定一個啱啱到埗嘅家庭

第一次幫手係喺我仲未搞星月同行之前，朋友介紹咗一個即將會以BNO visa過嚟英國嘅單親家庭，因為佢哋喺英國冇人冇物，到埗後想搵個照應。

喺佢哋未嚟之前，我哋已經有聯絡傾吓佢嘅狀況。當時佢最主要想買車，因為對車款同車嘅性能都唔熟，所以想我幫佢睇吓。等佢隔離完之後我哋就開始去車行度睇車，除咗比較一啲大路嘅車牌子同款式之外，我建議佢去一啲有牌子嘅二手車行買一啲Approved Car，呢啲車除咗有原廠保養之外都比較有質素。因為呢面二手車嘅需求好大，同埋佢哋比較想揸自動波同埋行汽油嘅車，變相揀得落手嘅車就好少，有時睇啱可能都已經俾人買咗。另外車行保險問題，揸住香港牌係唔可以試車，所以我都有幫佢試埋車。當然我仲做埋教車師傅同佢熟習吓英國嘅道路同路牌點樣睇。

除咗載佢去唔同嘅車行睇車之外，我都有陪佢去睇傢俬、買日用品同埋睇吓附近嘅環境，最主要都係想幫佢盡快熟習呢度嘅生活。其實呢一個家庭對於移民生活都算係正面同埋積極，只係生活上有啲細節唔清楚需要有經驗嘅過來人幫手。當然後來我哋都溝通多咗，甚至做埋朋友，我哋兩家人周不時都會一齊聯誼吓。

經營星月同行

星月同行配對嘅運作就係就住星星 (即將移民嘅香港人) 嘅需求再幫佢哋配對月亮 (在英港人)，我哋會按住雙方嘅地區距離、職業甚至家庭背景去做一個配對，務求令到大家有一個銜接點可以互相交流、照應。我哋作為管理員，幫佢哋配對完之後，會至少每月跟進，了解雙方互動情況。當然我哋都好希望星星同月亮雙方最後可以成為朋友、擴大喺英國嘅社交圈子，因為星月同行呢個計劃本來就係想透過幫助即將移民嘅香港人去凝聚喺英國生活嘅香港社群，加強香港人對香港文化、對民族嘅歸屬感。長遠嚟講我哋都希望可以籌備一啲聯誼活動甚至係團購去幫助一啲有需要嘅香港人。我哋仲喺起步階段，所以都會想搵多啲在英港人去參與呢個活動可以幫助更多未來會嚟英國定居嘅香港人。

受訪者：Ivan Yip —— 星月同行創辦人之一

星月同行呢個計劃旨在配對即將要嚟英國嘅香港人同已經過咗嚟英國定居嘅香港人，希望透過配對香港人可以喺英國互相幫助，幫佢哋盡快適應呢度嘅生活。過咗嚟英國一年嘅Ivan係星月同行嘅創辦人之一，原來喺佢籌備星月同行前就已經有幫過香港家庭嚟英國定居嘅經驗，而呢啲經歷亦都啟發到佢去成立星月同行嘅計劃，佢希望可以鼓勵其他在英港人去幫助更多有需要嘅香港人。

需要更多資訊幫忙嘅香港人，歡迎瀏覽網頁：hkg.one